Дар Душанбе намояндагии Донишгоҳи Қазон ифтитоҳ мешавад

Душанбе, 23 декабр. (АМИТ «Ховар», Лутфия Эшонқулова). – Ифтитоҳи намояндагии Донишгоҳи миллии тадқиқотию технологии шаҳри Қазони Федератсияи Русия дар Омӯзишгоҳи касбҳои техникии № 66 – и шаҳри Душанбе дар назар аст. Дар ин бора ба АМИТ «Ховар» дар Маркази матбуоти Хадамоти Муҳоҷирати назди Ҳукумати Ҷумҳурии Тоҷикистон иттилоъ доданд.Мувофиқи суханони манбаъ, Донишгоҳи мазкур аз 1 сентябри соли 2012 ба фаъолияти худ шурӯъ мекунад.Ҳоло дар Омӯзишгоҳи касбию техникии № 66 – и шаҳри Душанбе, ки аз 1 сентябри соли 2011 фаъолият дорад, 100 нафар шаҳрвандони Ҷумҳурии Тоҷикистон аз рӯи чунин ихтисосҳои дархостӣ, чун васлгарони барқӣ, кафшергарони газу барқӣ ва харротон, таҳсил менамоянд.Барои ба муҳоҷирони меҳнатӣ ёд додани технологияҳои муосир ва бо мақсади иҷрои Фармони Президенти ҶТ таҳти рақами 1014 аз 21 январи соли 2001 «Дар бораи Хадамоти муҳоҷирати назди Ҳукумати ҶТ» лоиҳаи шартномаи ҳамкории хадамоти муҳоҷирати ҶТ бо Вазорати маорифи Тоҷикистон ҷиҳати тарбияи касбии муҳоҷирони меҳнатӣ тарҳрезӣ ва таҳия шудааст. Ин лоиҳа ҷиҳати мутобиқат ба Вазорати маорифи Ҷумҳурии Тоҷикистон ирсол шудааст, — зикр намуд мусоҳиб.