Эроди Шӯрои уламо нисбат ба ташкилкунандагони Ошӯро дар Тоҷикистон

Душанбе, 6 декабр. (АМИТ «Ховар», Бекназари Абӯбакр). — «Шўрои уламои Ҷумҳурии Тоҷикистон ва пешвоёни дини ислом дар Тоҷикистон- домулло эшони Абдулхалилҷони Ҳисорӣ, домулло Маҳмадии Қумсангирӣ, домулло Холмуроди Кӯлобӣ,  Алломаи Регарӣ, домулло Муҳаммаднабӣ, домулло Бурҳонуддин, домулло Одинабек аз ноҳияи Рӯдакӣ, инчунин 24 нафар имомхатибони тамоми масҷидҳои ҷомеи шаҳри Душанбе ва дигарон нисбат ба баргузории Ошўро ҳамчун маросими динӣ аз ҷониби аҳли ташайюъ эрод надорад, зеро ин роҳи интихобкардаи онҳост. Аммо дар мисоли Тӯраҷонзодаҳо эрод дорем, чунки амали онҳо боиси гумроҳии пайравони мазҳабҳо мегардад ва онҳо худро пайравони як мазҳаб дониста амали дигарро байни мардум тарғиб мекунанд, ки ин ҳолат дурўягиро мемонад», — чунин омадааст дар қарори маҷлиси Шӯрои уламои Маркази исломии Ҷумҳурии Тоҷикистон, ки имрӯз бо иштироки рӯҳониён доир гардид.Дар ин қарор зикр мегардад, ки бо назардошти он, ки мардуми шарифи Тоҷикистон пайрави мазҳаби ҳанафӣ буда, таърихан на дар Бухорову Самарқанд, на дар Хатлону Хуҷанд ва на Ҳироту Ҳисори бостон, ки садҳо уламо ва донишмандони ҷаҳониро дидааст, дар ҳеҷ давру замон маросими Ошўроро мотам нагирифтаанд, аз ин хотир Шўрои уламои Ҷумҳурии Тоҷикистон амали Тўраҷонзодаҳоро дар мавриди мотамгирии Ошўро, ки дар таърихи 2 декабри соли 2011 дар масҷиди ҷомеи деҳаи Туркободи шаҳри Ваҳдат анҷом доданд, ба пуррагӣ мухолифи таълимоти мазҳаби ҳанафӣ меҳисобад.«Амали Тўраҷонзодаҳо, ки ба қолаб ё таълимоти мазҳаби ҳанафӣ ворид намудани андешаҳои бегона ва ифротиро мемонад, метавонад дар оянда омили навбатии барангехтани фитна, иғво ва бадбинии мазҳабӣ гардад. Шўрои уламо чунин амали иғвогаронаи Тўраҷонзодаҳоро, ки ба хусумат ва бадбинии мазҳабӣ замина мегузорад, қатъиян маҳкум намуда, аз уламо, донишмандон, имомхатибон ва мардуми шарифи Тоҷикистон даъват ба амал меорад, ки аз тарғиб ва паҳн намудани дидгоҳи Тўраҷонзодаҳо оиди ин маросим ва пайравӣ ба ақидаи онҳо, дар маҷлису маъракаҳо ва иттиҳодияҳои динӣ худдорӣ кунанд.Уламо, донишмандон ва имомхатибон дар байни намозгузорон роҷеъ ба покизагии мазҳаби аҷдодӣ корҳои фаҳмондадиҳӣ баранд»,- зикр гардидааст дар қарор.Гуфта мешавад, ки Шўрои уламои Ҷумҳурии Тоҷикистон аҳли тариқат ва сӯфияро дастгирӣ менамояд, аммо амалҳоеро, ки аз тарафи шогирдон ва муридони Шайх Темур содир шудааст, қатъиян маҳкум намуда, ба тамоми имомхатибон дастур медиҳад, ки мардумро аз нодуруст будани ин амал огоҳ намоянд. Дар баробари ин, Шўрои уламо аз мақомоти ваколатдори давлатӣ оид ба дин ва дигар мақомоти ҳифзи ҳуқуқ дархост менамояд, ки ба ин амали Тўраҷонзодаҳо баҳои ҳуқуқӣ дода, баҳри пешгирӣ намудани чунин амалҳои бегонапарастӣ чораҳои қатъӣ андешанд.