Фарзандони муҳоҷирони меҳнатиро тарбия мекунанд

Душанбе, 8 декабр. (АМИТ «Ховар», Бекназари Абӯбакр). — Муассисаи давлатии солимгардонӣ ва ҳифзи кӯдакони шаҳри Хуҷанд, ки чанде пеш таъсис ёфта буд, бачагони ятиму бепарастор ва душвортарбия, фарзандони оилаҳои носолим, ҳамчунин кӯдакони волидайнашон дар муҳоҷирати меҳнатӣ бударо аз гӯшаву канори вилояти Суғд дар паноҳи худ гирифтааст.Аз маркази матбуоти маъмурияти шаҳри Хуҷанд ба АМИТ «Ховар» иттилоъ доданд, ки раиси шаҳри Хуҷанд Раҷаббой Каримов 7 декабр ба аёдати тарбиятгирандагони ин муассиса омада, ба онҳо ба миқдори лозимӣ маводи ғизоӣ овард. Вай бо фаъолияти мураббиён, аҳволи бачагон, вазъи утоқҳои корӣ, толори варзишӣ, рафти ҳунаромӯзии бачагон шинос шуда, баҳри ҳалли мушкилоти мавҷуда, беҳдошти шароити зисту тарбия, таъминот бо либос ва маводи ғизоӣ ба масъулин дастуру супоришҳо дод.