Ифтитоҳи бинои нави Сафорати Тоҷикистон дар Берлин

Душанбе, 15 декабр. (АМИТ «Ховар»). – Дирӯз, 14 декабр дар шаҳри Берлин бо иштироки Сарвари давлат Эмомалӣ Раҳмон бинои нави Сафорати Тоҷикистон дар Олмон ифтитоҳ ёфт.Зимни боздид аён гардид, ки бинои сафорат дорои шароити зарурии кори пурсамар барои намояндагии дипломатии Тоҷикистон дар Олмон аст.Бо қаноатмандӣ аз шароити муҳайёшуда, изҳори боварӣ карда шуд, ки Сафорати Тоҷикистон дар Берлин ва ҳам Сафорати Олмон дар Душанбе барои иҷрои нияту нақшаҳои таҳкиму тавсеаи робитаҳои дўстиву ҳамкории барои ҳарду ҷониб судманд минбаъд низ ҷаҳду талош мекунанд. Сарвари давлат Эмомалӣ Раҳмон бо қаноатмандӣ ёдовар шуд, ки Олмон нахустин кишвари Аврупо буд, ки сафораташ дар Душанбе ифтитоҳ ёфт ва Тоҷикистон ҳам миёни кишварҳои ин қитъаи олам сафорати аввалини худро дар ҳамин кишвар боз намуда буд.Хотиррасон бояд намуд, ки имрўз баъд аз зуҳр Сарвари давлати Тоҷикистон Эмомалӣ Раҳмон бо Президенти ҷумҳурии Федеролии Олмон Кристиан Вулф ва Канслери федеролии ин кишвар хонум Ангела Меркел мулоқот мекунад.Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.