Имзои санадҳои ҳамкорӣ дар Минск

Душанбе, 26 декабр.(АМИТ «Ховар», Марзия Саидова).-Маркази миллии қонунгузории назди Президенти Ҷумҳурии Тоҷикистон бо Маркази миллии қонунгузорӣ ва тадқиқоти ҳуқуқии маъмурияти Президенти Ҷумҳурии Беларус Ёддошти ҳусни тафоҳум ва бо Маркази миллии иттилооти ҳуқуқии маъмурияти Президенти Ҷумҳурии Беларус Созишмномаи ҳамкорӣ ба имзо расонид. Санадҳои мазкурро дар Минск аз ҷониби Тоҷикистон Маҳмад Раҳимов, директори Маркази миллии қонунгузории назди Президенти Ҷумҳурии Тоҷикистон ва аз ҷониби Беларус В. Ипатов ва О. Кравтсов, роҳбарони идораҳои мазкури Беларус дар ҳузури сафири Ҷумҳурии Тоҷикистон дар Ҷумҳурии Беларус Қозидавлат Қоимдодов ба имзо расониданд. Ёддошти ҳусни тафоҳум мубодилаи фаъолияти қонунгузорӣ, гузаронидани машваратҳои дуҷониба оид ба масъалаҳои муҳими рушди қонунгузорӣ, анҷом додани тадқиқоти илмӣ дар соҳаи ҳуқуқ ва нашри мақолаҳои илмиро дар бар мегирад. Дар асоси Созишномаи ҳамкории ба тасвиб расида ҷонибҳо ҳангоми таҳия ва татбиқи лоиҳаҳо, барномаҳои мақсаднок дар соҳаи иттилоотонӣ, фаъолияти тадқиқотӣ, ворид сохтани технологияҳои комуникатсионӣ ва иттилоотӣ дар соҳаи ҳуқуқ, ҳамзамон гузаронидани конфронсҳои илмию амалӣ, семинарҳо ва дигар чорабиниҳоро амалӣ мегардонанд.