Иштироки ширкатҳои туркӣ дар рушди соҳаҳои иқтисодӣ

Душанбе, 2 декабр. (АМИТ «Ховар», Покиза Маҳмадбекова). — Дар Вазорати рушди иқтисод ва савдои Ҷумҳурии Тоҷикистон мулоқоти муовини аввали вазир Ҳамидуллохон Фақиров бо роҳбарони ширкатҳои аъзои Конфедератсияи соҳибкорон ва саноатчиёни «TUSKON» баргузор гардид.Тавре ки аз котиботи Вазорати мазкур ба АМИТ «Ховар» хабар доданд, дар ҷараёни мулоқот Ҳ. Фақиров иштироки фаъоли ширкатҳои туркиро дар рушди соҳаҳои мухталифи иқтисоди миллӣ ба сифати самараи нек арзёбӣ кард.«Ҳамчунин дар рафти мулоқот атрофи рушди ҳамкориҳо дар соҳаҳои иқтисод ва тиҷорат, нақлиёт ва коммуникатсия, ташкили корхонаҳои муштараки саноатӣ, тандурустӣ, илму маориф, сайёҳӣ, истеҳсол ва коркарди маҳсулоти кишоварзӣ дар кишвар ва ҷалби сармоя ба ин соҳаҳо, инчунин мубодилаи таҷрибаи мутахассисон дар соҳаҳои афзалиятнок гуфтугӯи судманд сурат гирифт»,-қайд намуд манбаъ.