Коҳиши ҷинояткорӣ дар миёни наврасон

Душанбе, 15 декабр. (АМИТ «Ховар», Бекназари Абӯбакр). — Тибқи дастури комиссияи миллӣ оид ба ҳуқуқи кӯдак ва дастгирии ташкилоти ЮНИСЕФ дар шаҳру ноҳияҳои Хуҷанд, Исфара, Панҷакент, Конибодом, Истаравшан ва Б.Ғафуров лоиҳа таҳти унвони «Равонакунии адолати алтернативӣ нисбат ба ноболиғон» татбиқ гардид.Дар доираи амалисозии ин лоиҳа бо кормандони Хадамоти пешгирии хуқуқвайронкунӣ байни ноболиғони шӯъбаҳои корҳои дохилӣ, кормандони маркази таҳсилоти иловагии шӯъбаҳои маориф, прокуратура ва суд семинарҳо доир гардид.Ҳамчунин бо мақсади ҷалби таваҷҷӯҳи ҷомеа ба ҳаёти кӯдакони имконияташон маҳдуд ва фарогирии онҳо ба таҳсил дар телевизиони вилоят барномаҳои махсус таҳия гардида, бо кормандони соҳа семинарҳои дастурдиҳӣ гузаронида шуд.Аз хадамоти матбуоти раиси вилояти Суғд ба АМИТ «Ховар» иттилоъ доданд, ки дар 11 моҳи соли равон дар миқёси вилоят аз ҷониби ноболиғон 160 ҳодисаи қонуншиканӣ ба қайд гирифта шуд, ки назар ба ҳамин давраи соли гузашта 30 ҳодиса кам аст.