Конфронси RECCA – V дар Душанбе баргузор мешавад

Душанбе, 5 декабр. (АМИТ «Ховар», Пайрав Назаров ). –3 декабри соли 2011 дар остонаи Конфронси байналмилалӣ оид ба Афғонистон дар шаҳри Бонн мулоқоти Вазири корҳои хориҷии ҶТ Ҳамрохон Зарифӣ бо Вазири корҳои хориҷии Ҷумҳурии Исломии Афғонистон Залмай Расул баргузор гардид.Зимни вохӯрӣ ҷонибҳо перомуни барномаи Конфронси қарибулвуқӯъи байналмилалӣ оид ба Афғонистон табодули назар карда, масъалаҳои амалии ҳамкории дуҷониба ва минтақавиро мавриди муҳокима қарор доданд. Дар ин робита афзалияти махсуси таҳия ва татбиқи минбаъдаи лоиҳаҳои инфрасохторӣ ва дигар лоиҳаҳои дорои аҳамияти минтақавӣ, ки ба эҳёи иҷтимоию иқтисодии Афғонистон ва тақвияти равандҳои ҳамгироӣ мусоидат менамоянд, қайд карда шуд. Ҳ. Зарифӣ бори дигар омодагии Тоҷикистонро барои минбаъд ҳам расонидани кӯмаки васеъ ва ҳамаҷониба ба ҳукумат ва мардуми Афғонистон дар ҳалли мушкилоти муҳимтарини иҷтимоию иқтисодӣ ва таъмини сулҳу субот дар ин кишвар таъкид сохт. Вазирони корҳои хориҷии ҳарду давлат инчунин масъалаҳои дар сатҳи баланд омода сохтан ва гузаронидани Конфронси RECCA – V-ро дар моҳи марти соли 2012 дар шаҳри Душанбе баррасӣ намуданд.Дар ин бора аз раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ Ховар иттилоъ доданд.