Кормандони Агентии назорати маводи нашъадор сатҳи малакаи худро бардоштанд

Душанбе, 12 декабр. (АМИТ «Ховар», Анварбек Сиддиқов).-Дар Агентии назорати маводи нашъаовари назди Президенти Ҷумҳурии Тоҷикистон маросими супурдани сертификатҳо ба ширкаткунандагони тренинги “Тамоюлҳои ҷаҳонии муомилоти ғайриқонунии маводи мухаддир”, ки Раёсати мубориза бо мухаддироти назди Сафорати ИМА дар Тоҷикистон (ДЕА) доир намуда буд, баргузор гардид.Тавре ки ба АМИТ «Ховар» аз маркази матбуоти агентии мазкур хабар доданд, дар доираи курси таълимӣ масъалаҳои вобаста ба тамоюлҳои фарогири муомилоти ғайриқонунии маводи мухаддир, ҷамъоварӣ ва таҳлили ахбор, тафтиши парвандаҳои ҷиноятии алоқаманд ба ин ҷиноятҳо, ҳамчунин баргузории дарсҳои амалии баланд бардоштани маҳорати касбӣ дар самти мубориза бо муомилоти ғайриқонунии мухаддирот баррасӣ шуданд.Дар маросими ҷамъбасти тренинг муовини директори Агентӣ Бунафша Одинаева дар суханронии худ ба аҳамияти баргузории чунин дарсҳои омӯзишӣ барои беҳбуд бахшидан ба самаранокии мубориза бо мухаддирот дар минтақа таъкид намуда, изҳори умед кард, ки ҳамкориҳо дар самти мубориза бо маводи нашъадор дар оянда низ таҳким хоҳанд ёфт.Намояндагони ДЕА гуфтанд, ки муколамаи фаъол миёни Агентии назорати маводи нашъаовари назди Президенти Ҷумҳурии Тоҷикистон ва Раёсати мубориза бо маводи мухаддири назди Сафорати ИМА дар Тоҷикистон (ДЕА) дар оянда низ ба ҳамкориҳои муваффақона мусоидат хоҳанд намуд. Дар хотима ба ширкаткунандагони тренинг сертификатҳо супорида шуданд.