Олимтой Баҳористон шуд

Душанбе, 15 декабр.(АМИТ «Ховар», Марзия Саидова).-Як қатор деҳот ва ёздаҳ деҳаи ноҳияи Восеи вилояти Хатлон табдили ном карданд. Дар ин хусус 15 декабр дар иҷлосияи ҳафтуми Маҷлиси миллии Маҷлиси Олии ҷумҳурӣ қарор қабул гардид. Зимни тавзеҳи масъалаи мазкур Муним Холиқов, раиси Кумитаи Маҷлиси миллӣ гуфт, ки табдили номи деҳот ва деҳаҳои ноҳияи Восеъ дар асоси пешниҳоди Ҳукумати Ҷумҳурии Тоҷикистон ва илтимосномаи Маҷлиси вакилони халқи вилояти Хатлон сурат гирифтаааст. Минбаъд номи деҳоти Пахтаобод ба номи Мирзоалӣ Вайсов, Меҳнатобод ба номи Абдӣ Авазов, деҳоти Арал ба номи Миралӣ Маҳмадалиев ва деҳоти Пахтакор ба номи Худоёр Раҷабов зикр мешаванд. Инчунин номи деҳаҳои Учқун ба деҳаи Эмом Таърифӣ, Комсомолобод ба Ҷавонӣ, Арпатугулдӣ ба деҳаи Ҷаврез, Қайқидашт ба Истиқлол, Гулисой ба Гулрӯд, Авғондилӣ ба Хоҷа Ғалтон, Бешариқ ба Заркорон, Қайрағоч Хоҷа Мӯъмин, Лархобӣ ба деҳаи Ҳасан Қурбонов, Қӯшқорбулоқ ба Гулафшон ва Олимтой ба Баҳористон табдил шуданд. Муним Холиқов афзуд, ки зарурати тағйир додани номи деҳот ва деҳаҳо бевосита ба истиқлолияти давлатӣ, гиромидошти таърихи кишвар, арҷгузорӣ ва пос доштани хотираи неки шахсиятҳои барҷаста ва мӯътабари диёр ва тоза нигоҳ доштани забони давлатӣ вобаста мебошад.