Озмун барои беҳтарин асари мусиқӣ

Душанбе, 19 декабр. (АМИТ «Ховар», Раъно Нусратуллоева).- Вазорати фарҳанги Ҷумҳурии Тоҷикистон бахшида ба ҷашнҳои Наврӯзи байналмилалӣ, Ваҳдати миллӣ, Истиқлолияти давлатии Ҷумҳурии Тоҷикистон аз 1-уми январи соли 2012 то 1 марти соли 2012 барои хариди асарҳои нав дар жанрҳои гуногуни санъати мусиқии касбӣ дар соли 2012, аз қабили суруд (бо ҳамовозии ҳайатҳои гуногуни мутрибон, ансамбли мусиқии камеравӣ, оркестри созҳои мардумӣ.), асарҳои мусиқӣ барои якканавозон ва ансамблҳои гуногун, асарҳои мусиқии рақсӣ ва эстрадӣ ва асарҳо барои хор ва оркестрҳои гуногуни мусиқӣ озмун эълон менамояд.Беҳтарин асарҳои жанрҳои гуногуни санъати мусиқӣ аз ҷониби Вазорати фарҳанги Ҷумҳурии Тоҷикистон харидорӣ мешаванд. Озмун аввали моҳи март ҷамъбаст мегардад.Дар ин бора ба хабарнигори АМИТ «Ховар» сармутахассиси маркази матбуоти Вазорати фарҳанг Раҳматулло Раҳматуллоев хабар дод.