Сӯҳроб Шарипов вакил интихоб шуд

Душанбе, 19 декабр. (АМИТ «Ховар», Анварбек Сиддиқов).- 18 декабри соли ҷорӣ дар ҳавзаи якмандатии интихоботии Шоҳмансур №3 ба ивази вакили хориҷшуда интихоботи миёнадаврии вакили Маҷлиси намояндагони Маҷлиси Олии Ҷумҳурии Тоҷикистон баргузор гардид. Тавре ки аз Комиссияи марказии интихобот ва раъйпурсии Ҷумҳурии Тоҷикистон ба АМИТ «Ховар» иттилоъ доданд, дар ҳавзаи якмандатии интихоботии Шоҳмансур №3 аз 70 ҳазору 816 нафар интихобкунанда 62 ҳазору 337 нафар ва ё 88 фоиз иштирок намуданд. Аз ҷумла, ба тарафдории А. Ғаффоров 3724 нафар ё 5, 97 фоиз, ба ҷонибдории С.М. Оймаҳмадов 3810 нафар ё 6,11 фоиз, ба тарафдории А.А. Турсунов 3541 нафар ё 5, 68 фоиз ва ба ҷонибдории С.И. Шарипов 49 ҳазору 133 нафар ё 78,82 фоиз ва зидди ҳамаи номзадҳо 1238 нафар ё 1,99 фоизи интихобкунандагон овоз доданд. Ҷараёни интихоботи мазкурро 172 нафар нозир ва намояндагони ВАО назорат карданд. Ҳамин тавр, Шарипов Сӯҳроб Ибронович (соли таваллудаш 1963), ки аз тарафи Ҳизби халқии демократии Тоҷикистон пешбарӣ шуда буд, аз ин ҳавза вакили намояндагони Маҷлиси Олии Ҷумҳурии Тоҷикистон интихоб гардид.