Санади байни Тоҷикистону Ҳиндустон матраҳ шуд

Душанбе, 5 декабр.(АМИТ «Ховар», Марзия Саидова).- Имрӯз дар ҷаласаи Шӯрои палатаи поёнии парлумони мамлакат, ки таҳти раёсати Шукурҷон Зуҳуров, раиси Маҷлиси намояндагони МО ҶТ ҷумҳурӣ баргузор гардид, ёддошти тафоҳум байни Вазорати энергетика ва саноати Ҷумҳурии Тоҷикистон ва Вазорати корҳои хориҷии Ҳиндустон дар бораи таҷдиди нерӯгоҳи барқии обии Варзоб -1 баррасӣ шуд. Дар ҷаласаи Шӯро ҳамзамон лоиҳаи Қонуни Ҷумҳурии Тоҷикистон «Дар бораи ворид намудани тағйиру иловаҳо ба Кодекси меҳнати Ҷумҳурии Тоҷикистон» муҳокима гардид. Тибқи иттилои Муҳаммадато Султонов, котиби матбуотии Маҷлиси намояндагон масъалаҳои мазкур ҷиҳати баррасӣ ва қабул ба ҷаласаи навбатии иҷлосияи сеюми Маҷлиси намояндагони Маҷлиси Олии Ҷумҳурии Тоҷикистон даъвати чорум, ки баргузории он 7 декабри соли равон дар назар аст, пешниҳод шуданд.