Соҳибкорони туркӣ имкониятҳои Тоҷикистонро меомӯзанд

Душанбе, 5 декабр.(АМИТ «Ховар», Марзия Саидова).-Протоколҳои ҳамкорӣ оид ба омӯзишӣ масъалаи ташхиси истеҳсолоти коркарди нахи пахта ва пашм, инчунин оид ба таҷҳизоти техникаи кишоварзӣ дар Ҷумҳурии Тоҷикистон дар Вазорати энергетика ва саноати ҷумҳурӣ ба имзо расид. Дар робита ширкатҳои Конфедератсияи «TUSKON», «Ерсен Текстил» ва «Мiluza Group» Туркия масъалаи имконияти бунёди корхонаҳои коркарди нахи пахта ва пашм ва ширкати дигари туркӣ — «IGLI» масъалаи ба роҳ мондани истеҳсоли таҷҳизоти кишоварзиро дар Тоҷикистон мавриди омӯзиш қарор медиҳанд. Аз Вазорати энергетика ва саноати ҷумҳурӣ ба АМИТ «Ховар» иттилоъ доданд, ки ҳафтаи сипаришуда Гул Шералӣ, вазири энергетика ва саноати ҷумҳурӣ як гурӯҳ роҳбарони ширкатҳои Конфедератсияи соҳибкорон ва саноатчиёни Туркияро ба ҳузур пазируфта буд, ки дар он масъалаи ҳамкорӣ дар бахши энергетика ва саноат мавриди баррасӣ қарор дода шуда буданд.