Таъсиси Шӯрои ҳимояи ҳуқуқи истеъмолкунандагон

Душанбе, 26 декабр. (АМИТ «Ховар», Бекназари Абӯбакр).- Бо мақсади ҷалби ниҳодҳои ҷамъиятии шаҳрвандӣ барои тартиб додан ва амалӣ намудани сиёсати давлат дар соҳаи стандартизатсия, баҳодиҳии мутобиқат ва дигар масъалаҳои танзими техникӣ дар назди Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон («Тоҷикстандарт») Шӯрои ҷамъиятии машваратӣ оид ба стандартизатсия ва баҳодиҳии мутобиқат таъсис дода шуд.24 декабр ҷаласаи нахустини Шӯро доир шуда ва дар он масоили марбут ба фаъолияти Шӯро муҳокима ва баррасӣ гардид. Шўро тасмим гирифт, ки дар давоми соли 2012 масъалаҳои фаъолияти Кумитаи техникӣ оид ба стандартикунонии маҳсулоти хўрокворӣ; кор бо муроҷиатҳои шаҳрвандон ва ташкилотҳо; барномаи таҳияи стандартҳои давлатӣ; татбиқи стандартҳои минтақавӣ ва байналмилалӣ доир ба энергоменеҷмент ва сарфаҷўии энергия; амалӣ намудани Стратегияи инфрасохтори сифат; ҷорӣ намудан ва сертификатсияи системаҳои сифат дар корхонаҳои ватанӣ ва дигар масоили мубрамро, ки ба пешрафти соҳа мусоидат мекунанд, пайгирӣ кунад.Ба ҳайати Шӯро мутахассисони варзидаи соҳаи танзими техникӣ, сифати маҳсулот, олимон ва ҳамчунин намояндагони иттиҳодияҳои ҷамъиятию ассосиатсияҳо шомиланд. Мақсади асосии таъсиси Шӯро — аз байн бурдани монеаҳо дар савдо, ҳимояи ҳуқуқи истеъмолкунандагон ва дар ин замина ҷалби ниҳодҳои ҷамъиятии шаҳрвандӣ барои тартиб додан ва татбиқи сиёсати давлат дар соҳаи танзими техникӣ, мусоидат ба ташаккули афкори ҷомеа дар ҷодаи танзими техникӣ ва таъмини сифати маҳсулоти истеҳсолшванда, баланд бардоштани сатҳи фаҳмиши ҷомеа дар бораи равандҳои асосии фаъолияти “Тоҷикстандарт” ва густариши равобити “Тоҷикстандарт” бо иттиҳодияҳои ҷамъиятӣ ва шаҳрвандон мебошад.