Таъсиси Шӯрои ҷамъиятии собиқадорон дар Агентӣ

Душанбе, 19 декабр. (АМИТ «Ховар», Лутфия Эшонкулова).-Мулоқоти собиқадорон ва кормандони масъули Агентии назорати маводи нашъаовари назди Президенти Ҷумҳурии Тоҷикистон, ки рӯзи 15 декабри соли равон дар Дастгоҳи марказии Агентӣ доир гардид, бо пешниҳоди ташкили Шӯрои собиқадорон ба анҷом расид. Дар мулоқот баромадкунандагон аз фаъолияти 12 солаи пурсамари Агентӣ ёдовар шуданд. Дар муддати на чандон тӯлонӣ дар самти ташкили мубориза бо муомилоти маводи нашъаовар, моддаҳои психотропӣ ва прекурсорҳо, пешгирии нашъамандӣ, таҳияи санадҳои меъёрию ҳуқуқӣ, ҳамкориҳои байналмилалӣ, тадбирҳо барои ҳамоҳангсозии фаъолиятҳо бо мақомоти ҳифзи ҳуқуқ ва сохторҳои қудратӣ корҳои зиёд ба сомон расонида шуданд. Дар ташкил ва баргузории ин корҳо дар баробари кормандон, инчунин саҳми собиқадорон зиёд буда, онҳо поягузорони Агентӣ ба ҳисоб мераванд. Собиқадорон имконият доранд таҷриба, дониш ва маҳорати касбии худро ба кормандони ҷавони Агентӣ омӯзонанд.Иштирокчиёни ҷаласа қарор қабул карданд, ки Шӯрои собиқадорони Агентӣ ва Раёсати он дар ҳайати 9 нафар таъсис дода шавад. Лоиҳаҳои Ойинномаи Шӯро ва нақшаи кории он барои нимсолаи аввали соли 2012 таҳия шуда, барои муҳокима ва тасдиқ ба Раёсати Шӯро пешниҳод гардиданд.