Қарори Ҳукумати ҷумҳурӣ бе иҷро монд

Душанбе, 13 январ.(АМИТ «Ховар», Лаззат Диловарзод).-Корхонаи воҳиди давлатӣ (КВД)-и «Хоҷагии манзилию коммуналӣ» бо мақсади иҷрои бандҳои 1 ва 4 –и Қарори ҲукуматиҶТ «Дар бораи тадбирҳо оид ба ташкил намудани системаи безараргардонии ҷамъоварӣ, нигаҳдорӣ, интиқол ва коркарди лампаҳои симобдор» ба ҳамаи корхонаҳои зертобеаш супориши ҷиддӣ додааст. Дар ин супориш гуфта мешавад, ки ҷиҳати ташкил намудани нуқтаҳои қабули лампаҳои каммасрафи люминесентӣ ва дигар лампаҳои симобдори аз истифодабаромадаи аҳолӣ муштаракан бо мақомоти иҷроияи маҳаллии ҳокимияти давлатӣ дар тамоми шаҳру ноҳияҳои ҷумҳурӣ тадбирҳои зарурӣ андешанд.Бояд ёдовар шуд, ки корхонаҳои соҳаи коммуналӣ бо қувваи худ дар шаҳру ноҳияҳо нуқтаҳои қабули лампаҳои каммасрафи люминесентиро ташкил намуданд ва дар давоми соли 2011 аз аҳолӣ ба миқдори 27 ҳазору 200 дона лампаҳои люминесентии аз истифода баромадаро ҷамъ овардаанд. Мутаассифона, аз тарафи мақомоти иҷроияи маҳаллии ҳокимияти давлатии шаҳру ноҳияҳо барои безараргардонӣ ва интиқоли ин навъи лампаҳо ягон чораи мушаххасе ҷиҳати иҷрои бандҳои 1 ва 4 –и Қарори Ҳукумати ҷумҳурӣ дида нашудааст.