Таҷлили санаи барқароршавии муносиботи дипломатии ҶМЧ ва ҶТ

Душанбе, 4 январ. (АМИТ «Ховар», Пайрав Назаров). – Имсол Ҷумҳурии Мардумии Чин 20 – солагии барқароршавии муносиботро бо ҳар кадоми панҷ кишвари Осиёи Марказӣ таҷлил менамояд. Имрӯз, 4 январ, ба рӯзи барқароршавии муносибатҳои дипломатии байни Тоҷикистону Чин 20 сол пур мешавад.Дар робита бо ин Вазорати корҳои хориҷии ҶМЧ аз 18 то 28 декабри соли 2011 сафари намояндагони ВАО Қазоқистон, Қирғизистон, Тоҷикистон, Ӯзбекистон ва Туркманистонро ба кишвари Чин ташкил намуд. Дар ҷараёни ин сафар барои журналистон барномае таҳия шуда буд, ки мебоист онҳоро бо ҳаёти имрӯзаи ҷомеаи ҶМЧ шинос мекард. Сафари журналистон аз боздиди пойтахти Чин шаҳри Пекин оғоз ёфт. Дар ҷараёни сафар бо муовини вазири корҳои хориҷии ҶМЧ Чэн Гопин мулоқот баргузор гардид. Ҷаноби Чэн Гопин зимни мулоқоташ зикр намуд, ки Чин ва панҷ кишвари Осиёи Марказӣ ҳамсояҳои ба ҳам наздик буда ва дӯстии анъанавии байни онҳо решаҳои чуқури таърихӣ доранд. 20 сол аст, ки Чин ва кишварҳои Осиёи Марказӣ бо ҳам муносибатҳои мусоиди дӯстию ҳамкорӣ дошта, равобити мутақобилан муфиди сиёсиро ривоҷ медиҳанд, механизми ҳамкориро беҳтар месозанд ва онро дар соҳаҳои мухталиф густариш медиҳанд. Дипломати Чин изҳори умедворӣ намуд, ки журналистони кишварҳои Осиёи Марказӣ дар ҷараёни сафарашон бо ҳаёти мардуми Чин муфассал шинос шуда, ҳиссаи худро ба рушди ҳамкории дӯстонаи ин кишвар ва мамлакатҳои Осиёи Марказӣ мегузоранд.Дар ҷараёни мулоқот дар ВКХ ҶМЧ масъалаи тақвият бахшидани саъю кӯшишҳои кишварҳои аъзои Созмони Ҳамкории Шанхай низ мавриди баррасӣ қарор гирифт. Дар ҳоли ҳозир Чин ҳамраиси СҲШ буда ва моҳи июни соли 2012 дар ҶМЧ ҳамоиши ин созмон баргузор мегардад. Чэн Гопин ба саволҳои журналистон посух дода, гуфт, ки Чин ба фаъолияти муваффақонаи СҲШ боварии комил дорад.