Қарзҳо мувофиқи мақсад истифода мешаванд

Хоруғ, 22 феврал. (АМИТ «Ховар», Л.Додо ). – Ба манзури дар амал татбиқ намудани дастуру супоришҳои Сарвари давлат Эмомалӣ Раҳмон ҷиҳати дастгирии бахши воқеии иқтисодиёт, рушди соҳибкории хурду миёна ва дар заминаи ин фароҳам овардани ҷойҳои нави корӣ филиали Раёсати Бонки давлатии амонатгузории Ҷумҳурии Тоҷикистон («Амонатбонк») дар соли 2011 – ум ба 3571 нафар шаҳрвандон ба маблағи 21 миллиону 997 ҳазор сомонӣ қарз додаст.Соҳибкорони маҳаллӣ бо истифода аз қарзҳои филиали «Амонатбонк» кӯшиш мекунанд, ки ба рушди иқтисодию иҷтимоии кишвар ҳисса гузоранд. Масъалан, соҳибкор Орифшо Қурбоншоев ният дорад, ки бо бунёди маҷмаа иборат аз меҳмонхона барои қабули 30 нафар дар як маврид ва тарабхонаи дорои 200 ҷойи нишаст барои зиёда аз 20 нафар сокинони маҳаллӣ ҷойи кори доимӣ фароҳам орад.Тарабхонаи «Шуғнон» воқеъ дар маркази вилоят, ки бо тарҳи мемории тоҷикони минтақаи кӯҳистон бунёд шудааст, аз он гувоҳӣ медиҳад, ки қарзҳои филиали «Амонатбонк» мувофиқи мақсад истифода мешаванд.