Баррасии масоили ҳамкориҳои дуҷонибаи Тоҷикистон бо Бонки ҷаҳонӣ

Душанбе, 14 феврал. (АМИТ «Ховар», Дилшодаи Хайруллоҳ). – Дар мулоқоти Сарвазири Ҷумҳурии Тоҷикистон Оқил Оқилов бо Директори Бонки ҷаҳонӣ доир ба стратегия ва амалиёт дар Аврупо ва Осиёи Марказӣ Теодор Алерс ва Директори минтақавии бонки мазкур дар Осиёи Марказӣ Сароҷ Кумар Ҷа масоили ҳамкориҳои дуҷонибаи Тоҷикистон бо Бонки ҷаҳонӣ мавриди баррасӣ қарор дода шуд. Оқил Оқилов изҳор дошт, ки дар Тоҷикистон дар айни замон аз ҷониби Бонки ҷаҳонӣ як қатор лоиҳаҳои сармоягузорӣ дар ҳоли татбиқ қарор доранд, ки асосан соҳаҳои кишоварзӣ, энергетика ва обёрӣ, маориф, тандурустӣ ва бахшҳои давлатиро дар бар мегиранд. Ҳарчанд ҷараёни ҳамгироии Тоҷикистон ва Бонки ҷаҳонӣ дар сатҳи хуб қарор доранд, вале дар ин самт ҳанўз имконоту захираҳои истифоданашуда зиёданд,- таъкид кард Сарвазири мамлакат Оқил Оқилов. Дар мулоқот изҳори боварӣ карда шуд, ки ҷараёни татбиқи лоиҳаҳои Бонки ҷаҳонӣ дар Тоҷикистон суръати тоза гирифта, доираи ҳамкориҳои дуҷониба соҳаҳои дигари барои ҳар ду ҷониб афзалиятнокро фаро мегирад.