Бозиҳои охирини марҳилаи сеюми интихобии Ҷоми ҷаҳон дар Осиё

Душанбе, 28 феврал. ( АМИТ «Ховар», Аловиддин Бӯриев).- Рӯзи 29 –уми феврал дар қитъаи Осиё бозиҳои интихобии Ҷоми ҷаҳон, марҳилаи сеюм ба анҷом мерасанд. Дастаи мунтахаби Тоҷикистон, ки дар гурӯҳи “С” якҷоя бо дастаҳои Ҷопон, Ӯзбекистон, Куриёи Шимолӣ ҳунарнамоӣ мекард, дар бозии охирини худ бо дастаи мунтахаби Куриёи Шимолӣ пагоҳ соти 13 дар шаҳри Хуҷанд вориди майдон мешавад. Пешсафи ин гурӯҳ- Ӯзбекистон дар сафар меҳмони Ҷопон мешавад. Дар сурати ғалабаи футболбозони Ҷопон дар ин вохӯрӣ онҳо бо касби 13 имтиёз ва бо бартарии голҳои задаашон ба зинаи аввал мебароянд. Дар гурӯҳи “А” ҳам ғолиб дар вохӯрии охирин муайян мешавад. Дастаҳои мунтахаби Урдун ва Ироқ сохиби 12 имтиёзӣ буда, дар вохӯрии охирин Урдун дар сафар бо Чин ва Ироқ дар майдони худ бо Сингапур қувва месанҷанд. Вазъи бозиҳо дар гурӯҳи “Б” мисли гурӯҳи “А” аст. Дастаҳои мунтахаби Куриёи Ҷанубӣ ва Лубнон бо 10 имтиёзӣ дар садри ҷадвал қарор доранд. Шоми 29 феврал Куриё бо Кувайт ва Лубнон дар сафар муқобили дастаи мунтахаби Амороти Муттаҳидаи Араб ба дидори ҳам мераванд. Мусовӣ дар ҳар ду вохӯрӣ ба нафъи футболбозони Куриёи Ҷанубӣ хоҳад буд. Дар гурӯҳи “Д” дастаи мунтахаби Австралия бо 12 хол пешсаф аст. Арабистони Саудӣ бо 6 имтиёз ӯро дунбол мекунад. Дастаҳои мунтахаби Австралия бо Арабистони Саудӣ ва Уммон бо Таиланд қувва меозмоянд. Ниҳоят дар гурӯҳи “Е” вохӯрии дастаҳои мунтахаби Эрон ва Қатар, ки дар варзишгоҳи “Озодӣ”-и Теҳрон барпо мегардад, тақдирсоз хоҳад буд. Эрон бо 11 хол ва Қатар бо 9 хол дар садри ҷадвал қарор доранд. Дар ин гурӯҳ дастаҳои мунтахаби Баҳрайн ва Индонезия пагоҳ бо ҳам вомехӯранд. Ёдрас мешавем, ки дар силсилаи бозиҳои марҳилаи сеюм дастаҳои мунтахаби Тоҷикистон, Амороти Муттаҳидаи Араб, Сингапур ва Индонезия то ҳол ягон имтиёз ба даст наовардаанд.