Фестивали байналмилалии мусиқӣ дар Молдова
Маскав, 29 феврал. (АМИТ «Ховар», Ҳалима Хушқадамова). – Бо дастгирии Бунёди байнидавлатии ҳамкории башардӯстонаи давлатҳои аъзои ИДМ аз 1 то 10 март дар Молдова бахшида ба фаро расидани фасли баҳор Фестивали 46 – уми байналмилалии мусиқии «Мэртсишор – 2012» баргузор мегардад.Барномаи асосии консертии ин чорабиниро ҳунарнамоии ҳунарпешагон ва дастаҳои эҷодии кишварҳои собиқ Иттиҳоди Шӯравӣ ташкил медиҳад. Дар ин бора дар Вазорати фарҳанги Ҷумҳурии Молдова ба хабарнигори АМИТ «Ховар» дар қисми аврупоии кишварҳои ИДМ хабар доданд. Имсол фестивали байналмилалии мусиқии «Мэртсишор» иборат аз барномаи васеи фарҳангӣ буда, аз ҷумла 32 консерт баргузор мешавад. Дар фестивал баробари ҳунарпешагони номии Молдова ҳунарпешагони тамоми ҷаҳон ва кишварҳои аъзои Иттиҳод низ ҳунарнамоӣ мекунанд.Қобили зикр аст, ки «Мэртсишор – 2012» мушобеҳи рӯзи байналмилалии «Наврӯз – 2012» дар Тоҷикистон мебошад.