Кӯшишҳои ғайриқонунӣ ҷилавгирӣ шуданд

Душанбе, 13 феврал. (АМИТ «Ховар», Лутфия Эшонқулова). – Кормандони гумруки Тоҷикистон дар оғози моҳи феврал ду кӯшиши ғайриқонунии ба ҷумҳурӣ ворид намудани лампаҳои тафсони барқиро ҷилавгирӣ намуданд. Дар ин бора ба АМИТ «Ховар» дар маркази матбуоти Хадамоти гумруки кишвар хабар доданд. Мувофиқи суханони манбаъ, кормандони гумруки пойтахт дар ҷараёни ду амалиёти махсус 51 ҳазору 120 адад лампаҳои тафсонро аз гардиши ғайриқонунӣ бароварданд.Аз рӯи ин аъмол мувофиқи қонунгузории ҶТ чораҳои зарурӣ дида шудаанд.Мувофиқи маълумоти Хадамоти гумрук, мақомоти гумруки кишвар аз оғози сол 16 ҳодисаи ба ҷумҳурӣ хилофи қонун ворид намудани лампаҳои тафсони барқиро ошкор намуда, 54 ҳазор адади чунин лампаҳоро мусодира карданд.Хотирнишон месозем, ки дар Тоҷикистон аз соли 2009 фурӯши лампаҳои тафсон манъ шудааст.