Журналистони тоҷик — ғолибони Озмуни байналмилалӣ

Душанбе, 10 феврал. (АМИТ «Ховар», Людмила Дубинина). – 21 ва 22 феврал дар Хонаи марказии журналистони шаҳри Маскав бахшида ба инъикоси проблемаҳои муҳоҷират дар ВАО чорабиниҳо роҳандозӣ мешаванд. 21 феврал ҷаласаи васеи гурӯҳи корӣ оид ба тарҳрезии стратегияи ҳамгироии муҳоҷирон дар Федератсияи Русия баргузор мешавад. Дар кори маҷлис котибони матбуоти сафоратҳои Тоҷикистон, Қазоқистон, Қирғизистон, аъзои гурӯҳи корӣ ва намояндагони ВАО иштирок менамоянд.Барои иштирок дар ин чорабиниҳо ғолибони Озмуни якуми байналмилалӣ барои маводи беҳтарини ВАО дар бораи ҳамгироии муҳоҷирони меҳнатӣ хабарнигори рӯзномаи «Азия плюс» Манижа Қурбонова, коргардони студияи радио ва телевизиони Медиа – холдинги «Азия Плюс» Озод Маликов ва сармуҳаррири рӯзномаи «Вечерний Душанбе» («Шоми Душанбе») Равшан Махсумов даъват шудаанд.22 феврал ба ғолибон дар вазъияти ботантана дипломҳо супурда мешаванд.Дар ин бора котиби масъули матбуоти Иттифоқи журналистони Тоҷикистон Пӯлод Нуров ба АМИТ «Ховар» хабар дод.