Ҳ.Зарифӣ ба Токио даъват шудааст

Душанбе, 27 март. (АМИТ «Ховар»). – 26 март муовини вазири корҳои хориҷии Ҷопон Ҷо Накан аз рӯи натиҷаи мулоқот бо Президенти Тоҷикистон Эмомалӣ Раҳмон, ки дар дар чаҳорчӯбаи Конфронси ҳамкории иқтисодии минтақавӣ оид ба Афғонистон (RECCA-V) баргузор гардид, ба журналистон изҳор дошт, ки Тоҷикистон дар амри барқароршавии сулҳу суботи Афғонистон мақоми асосиро касб намудааст. Мувофиқи суханони мавсуф, моҳи июли соли равон дар шаҳри Токио конфронси байналмилалӣ оид ба қазияи Афғонистон баргузор шуда, тирамоҳ роҳандозӣ намудани муколамаи асосии «Ҷопон ва Осиё» дар назар аст.«Ба конфронси мазкур аз Ҷумҳурии Тоҷикистон вазири корҳои хориҷии ҶТ Ҳамрохон Зарифӣ даъват шудааст. Мо аз он хурсандем, ки Президенти Тоҷикистон ташаббусамонро пуштибонӣ намуд. Ғайр аз ин, мо имсол 20 – солагии барқароршавии муносибатҳои дипломатии миёни Тоҷикистону Ҷопонро таҷлил менамоем. Дар робита бо ин дар ҷараёни гуфтушунид аҳд кардем, ки муносибатҳои дӯстонаро минбаъд ҳам рушду густариш диҳем», — гуфт Ҷо Накан.