Фоидаи коркарди маҳсулоти пахта ва пӯст

Душанбе, 20 март. (АМИТ «Ховар», Лаззат Диловарзод).- Бо супориши Ҳукумати ҷумҳурӣ тамоми маҳсулоти пахта, аз ҷумла нахи он ва пӯсти чорво дар дохили кишвар коркард хоҳад шуд. Бино ба маълумоти Вазорати энергетика ва саноат дар моҳҳои январ — феврали соли 2012 дар истеҳсоли маҳсулоти нассоҷӣ ва дӯзандагӣ номгӯи истеҳсолоти саноатӣ 1,7 баробар, аз ҳисоби афзоиши истеҳсоли нахи пахта 1,9 баробар, газворҳои пахтагин 10,5 фоиз, ҷӯроб 2,2 фоиз, аз ҷумла ҷӯроби бачагона 1 фоиз, матоъҳои нобофта 14,5 фоиз, калобаи пахтагин 1,6 баробар зиёд шудааст.Дар ин давра истеҳсоли пӯст ва маснуоти чармӣ ба андозаи 1,8 баробар, пойафзол 1,6 баробар, аз ҷумла бачагона 2,2 баробар зиёд шудааст, ки ин аз ҳисоби коркарди пӯст ва истеҳсоли чарми ватанӣ мебошад ва дар як соли охир 3,3 баробар зиёд коркард шудааст.