Изҳори хушҳолии Аҳмад Муҳаммад Алӣ аз мулоқот бо Э. Раҳмон

Душанбе, 27 март. (АМИТ «Ховар», Дилшодаи Хайруллоҳ).- Дирӯз баъд аз мулоқот бо Президенти кишвар Эмомалӣ Раҳмон Президенти Бонки исломии рушд доктор Аҳмад Муҳаммад Алӣ ба журналистон хурсандии худро чунин баён намуд: «хеле шарафмандам, ки бо Сарвари давлати Тоҷикистон дар мавриди як қатор масъалаҳои бисёр муҳим ва мубрами рӯз мубодилаи афкори судманд намудам». Аҳмад Муҳаммад Алӣ зимни мулоқот Президентро барои ташкил ва баргузории Конфронси минтақавии ҳамкориҳои иқтисодӣ доир ба Афғонистон (RECCA-V), ки барои мусоидат ва кӯмак ба Афғонистон равона шудааст, табрику таҳният намуд.«Дарвоқеъ, ин ҳамоиши бисёр муҳим дар Тоҷикистон муваффақона ташкил ва баргузор гардид, ки он бевосита барои тамоми мардуми шарифи Афғонистон дар ин марҳилаи бисёр ҳассос ва муҳим кӯмак ва мусоидати амалӣ хоҳад расонид. Умуман сатҳ ва теъдоди зиёди иштироккунандагон ва намояндагони бисёр давлатҳои ҷаҳон дар ин ҳамоиш худ инъикосгари аҳамияти муҳими ҳамоиш аст, ки ба бародар ва хоҳарони мо дар Афғонистон кӯмак хоҳад намуд. Конфронс дар мавриди дарёфти роҳҳои муассири ҳалли мавзӯи марбут ба Афғонистон ба иштироккунандагони он имконоти хеле мусоид фароҳам овард. Илова бар ин зимни мулоқот бо Президенти кишвар мо як силсила пружаҳои минтақавиеро, ки имрӯз аз ҷониби Бонки Исломии Рушд дар Осиёи Марказӣ маблағгузорӣ ва татбиқ мешаванд, мавриди муҳокима қарор додем ва алалхусус перомуни лоиҳаҳо дар самти нақлиёт, нерӯи барқ ва таҳкиму густариши тиҷорату сармоягузорӣ гуфтугӯи хеле судманд анҷом додем. Сипас мӯҳтарам Эмомалӣ Раҳмон назар ва диди худро ҷиҳати густаришу тақвияти робитаҳои тиҷоратӣ ва ҳамкориҳои сармоягузорӣ, ки имрӯз рӯ ба инкишоф доранд, баён намуд ва мо махсусан мавзӯи ҳамкории зичро байни Ҷумҳурии Тоҷикистон ва Бунёди исломии маблағгузории тиҷорат, ки яке аз ҷузъ ва ё гурӯҳи Бонки исломии рушд маҳсуб мешавад, мавриди муҳокима қарор додем».Илова бар ин перомуни мавзӯи баргузории ҷаласаи солонаи шӯрои мудирони Бонки исломии рушд, ки дар соли 2013 дар Душанбе ба нақша гирифта шудааст, сӯҳбати бисёр судманд ва муфид доштем ва Президенти кишвар ба мо изҳори итминон намуд, ки тамоми роҳбарону масъулин ва мудирони Бонки исломии рушд (БИР) аз 56 кишвари аъзои БИР дар Тоҷикистон аз иштироки худ дар ин ҷаласаи бонуфуз таассуроти неке хоҳанд бардошт.