Мулоқоти Эмомалӣ Раҳмон бо Вазири давлатии Британияи Кабир оид ба Қувваҳои Мусаллаҳ

Душанбе, 2 март. (АМИТ «Ховар»). — Президенти кишвар Эмомалӣ Раҳмон Вазири давлатии Британияи Кабир оид ба Қувваҳои Мусаллаҳ Ник Харвиро ба ҳузур пазируфт.
Дар мулоқот ҳолати кунунӣ ва дурнамои муносибатҳои Тоҷикистону Британияи Кабир баррасӣ шуд.  «Британияи Кабир аз шарикони муҳими Тоҷикистон дар Аврупо аст ва мо ба густариши бемайлони робитаҳо бо он ҳавасмандем», — изҳор дошт зимни сӯҳбат Сарвари давлат Эмомалӣ Раҳмон.
Ник Харви, бо ишора ба нақши калидии Тоҷикистон дар Осиёи Марказӣ ва кумаки муҳими он ба нерӯҳои байналмилалии посдори сулҳ дар бозсозии эътидол дар Афғонистон, ба Сарвари давлат Эмомалӣ Раҳмон ва мардуми кишвар арзи сипос намуд.
Таваҷҷуҳи зиёд ба масоили ҳамкорӣ барои барқарорсозии амнияту субот дар Афғонистон, пешгирӣ аз паҳншавии хатари терроризму ифротгароӣ ва гардиши ғайриқонунии маводи мухаддир аз ин кишвари ноором ва таҳкими эътидоли минтақавӣ зоҳир карда шуд. Ник Харви, ҳамчунин таъкид дошт, ки ҷомеаи ҷаҳонӣ бояд ба Тоҷикистон бештар кумак намояд, то ки ин кишвар дар иҷрои рисолати муҳими худ барои пешгирӣ аз хатарҳои мазкур дар марзи тӯлониаш бо Афғонистони ноором ҳамеша муваффақ бошад.
Дар робита ба ин омодагии Британияи Кабир ба рушди ҳамкорӣ бо сохторҳои низомӣ ва ҳифзи ҳуқуқи Тоҷикистон таъкид гардид. Масоили ташкил ва густариши ҳамкории иқтисодию тиҷоратӣ ва сармоягузории миёни Тоҷикистону Британияи Кабир низ аз мавзӯъҳои асосии суҳбат буд.  Гуфтугӯйи судманд, ҳамчунин доир ба масоили байналмилалӣ ва дигар мавзӯъҳои мавриди таваҷҷуҳ сурат гирифт.
Дар ин бора ба АМИТ «Ховар» аз Хадамоти матбуоти Сарвари давлат иттилоъ доданд.