Ошно гардидани О. Оқилов бо вазъи корҳои соҳилмустаҳкамкунӣ

Душанбе, 5 март. (АМИТ «Ховар», Дилшодаи Хайруллоҳ).-Рӯзҳои 2-3- марти соли равон сарвазири Ҷумҳурии Тоҷикистон Оқил Оқилов бо мақсади шиносоӣ бо вазъи корҳои соҳилмустаҳкамкунӣ ва омодагии иншооти обрасон ба мавсими нави обёрӣ бо сафари корӣ дар шаҳру ноҳияҳои Кӯлоб, Ҳамадонӣ, Восеъ, Фархор, Мӯъминобод ва Панҷи вилояти Хатлон қарор дошт. Сарвазири мамлакат Оқил Оқилов бевосита аз маҳалҳои наздисоҳилии шаҳру ноҳияҳои мазкур дар соҳили сойу дарёҳои Ёхсу, Панҷ, Зиракӣ, Тебалай, Сурхоб ва Даҳана дидан карда, бо ҷараёни корҳои пешгирӣ ва таъмини бехатарии минтақаҳои обгузар шинос шуд. Дар ситоди корӣ Оқил Оқилов таъкид кард, ки бо назардошти сербориш омадани зимистони сипаришуда дар мавсими гармои имсола эҳтимоли зиёд гардидани селу обхезиҳо ва дигар офатҳои табиӣ мавҷуд аст ва бино бар ин бояд тадбирҳои саривақтии соҳилмустаҳкамкунӣ ва тоза кардани ҷӯйу заҳбурҳо тақвият бахшида шаванд.Ҳукумати Ҷумҳурии Тоҷикистон бо мақсади пешгирии ҳама гуна хавфу хатар тадбирҳои зарурӣ андешида, бо мақсади пешбурди корҳои тақвиятбахшии бехатарии мавзеъҳои наздисоҳилӣ ва минтақаҳои обгузар миқдори лозимии техника ва таҷҳизоти корӣ, масолеҳи сохтмонӣ ва маблағҳои заруриро пешбинӣ кардааст, изҳор дошт сарвазири мамлакат Оқил Оқилов Оқил Оқилов ба масъулини соҳа ва роҳбарияти шаҳру ноҳияҳои мазкур дастур дод, ки барои рафъи камбудиҳои ҷойдошта дар самти корҳои соҳилмустаҳкамкунӣ тадбирҳои зарурӣ андешида, истифодаи мақсадноки маблағҳои пешбинишуда, масолеҳи сохтмонӣ ва техникаю таҷҳизоти кориро таъмин намоянд. Сарвазири мамлакат ҳамзамон дар ин сафар бо ҳолати кунунии пойгоҳҳои обкашӣ ва омодагии иншооти обрасон ба мавсими нави обёрӣ шинос шуда ба роҳбарияти вилоят, раисони шаҳру ноҳияҳо ва масъулони соҳа барои сари вақт омода кардани иншооти мелиоративӣ ва таъмини кори мунтазами онҳо дар мавсим дастуру супоришҳои мушаххас дод.