Ҳисоботи телефонии раисони шаҳру ноҳияҳои тобеи марказ

Душанбе, 16 апрел. (АМИТ «Ховар»). — 14 апрел ба Президенти кишвар Эмомалӣ Раҳмон раисони шаҳру ноҳияҳои Рӯдакӣ, Ҳисор, Ваҳдат, Файзобод ва Турсунзода телефонӣ ҳисобот доданд. Таваҷҷӯҳи асосӣ ба нишондодҳои рушди иқтисодӣ, аз ҷумла иҷрои буҷети давлатӣ дар семоҳаи аввали соли равон, рафти киштукори баҳорӣ, тақвият додани корҳои созандагию бунёдкорӣ ва фаъолияти корхонаҳои саноатӣ, муҳайёсозии ҷойҳои нави корӣ ва ҳамчунин ҳифзи мардум аз хатари обхезӣ ва дигар офатҳои табиӣ зоҳир карда шуд. Таъкид гардид, ки бо истифода аз рӯзҳои офтобӣ бояд қафомонӣ аз нақшаи киштукори баҳорӣ, ки бар асари тӯл кашидани мавсими имсолаи сардмо ба миён омадааст, бартараф карда шавад. Барои таъмини ситодҳои аксуламал ба офатҳои табиӣ бо техникаю маводи зарурӣ ва дар ҳолати омодабош қарор додани онҳо супоришҳои мушаххас дода шуд. Дастуру ҳидоятҳои мушаххас, ҳамчунин доир ба шаборӯзӣ ба роҳ мондани фаъолияти корхонаҳои саноатӣ, бунёди корхонаҳои нав, муҳайёсозии ҷойҳои нави корӣ ва ободонию кабудизоркунии муҳити зист дода шуд.Дар ин бора ба АМИТ «Ховар» аз Хадамоти матбуоти Сарвари давлат иттилоъ доданд.