Беҳдошти соҳаи таълим

Душанбе, 27 апрел.(АМИТ «Ховар», Лаззат Диловарзод).- Бино ба иттилои директори мактаби миёнаи таҳсилоти умумии рақами 34-и деҳаи Қарадуми ноҳияи Қумсангири вилояти Хатлон Саидмуҳаммад Саидов, таъмири асосии мактаби мазкур дар чаҳорчӯбаи лоиҳаи «Ташаббуси коҳиши камбизоатӣ дар Тоҷикистон ва Афғонистон» аз ҷониби Барномаи рушди ҷомеаи СММ бо кӯмаки молиявии Ҳукумати Ҷопон ба анҷом расонида шуд.Ба иттилои манбаъ, бинои мактаби мазкур солҳои 80-уми асри гузашта ҳамчун Маркази беҳдошт сохта ба истифода дода шуда буд. Баъди солҳои 1993-94 ҳамчун бинои маъмурии совхоз истифода гардида то давраи таъмир дар ҳолати хеле хароб қарор дошт.Бо зиёд шудани шумораи муҳоҷирони дохилӣ ин бино ҳамчун таълимгоҳи таҳсилоти асосӣ (то синфи 9) ва аз соли 2007 ба мактаби миёнаи таҳсилоти умумӣ табдил дода шуд. Ҳоло дар ин мактаб 260 нафар хонанда ба таълим фаро гирифта шудаанд, ки 13 нафар омӯзгор ба хонандагон аз фанҳои гуногун дарс мегӯянд ва заминагузор дар соҳаи беҳдошти таълим барои рушди ҷомеаи маҳал мебошанд.