Душанбе шаҳри амну рафоқат

Душанбе, 16 апрел.(АМИТ «Ховар», Марзия Саидова).-Пойтахти Ҷумҳурии Тоҷикистон –шаҳри Душанбе аз ҷониби Созмони Милали Муттаҳид /СММ/ дар бахши «Шаҳрҳои амну рафоқат барои ҳамагон» интихоб гардид. Он ҳамчун макони татбиқи иқдомоти глобалии СММ дар бахши «Шаҳрҳои амну рафоқат барои ҳамагон» оид ба Барномаи тавсеаи ҳуқуқ ва имкониятҳои занону кӯдакон дар партави рушди устувори шаҳрҳо аз сӯи СММ пазируфта шудааст. Душанбе дорандаи Ҷоизаи «Шаҳри Сулҳ»-и ЮНЕСКО аз рӯи ҷавобгӯ будан ба талаботи амалакунандаи интихоби ниҳодҳои СММ- вуҷуди ӯҳдадории баланд аз ҷониби мақомоти маҳаллӣ, шаҳрдор ва ниҳоди намояндагии маҳаллӣ, зарфиятҳои ҳамкорӣ ва таваҷҷӯҳи хоса дар шаффофияти фаъолият ва таҷрибаҳои муваффақонаи се ниҳоди СММ- ЮНИФЕМ, ЮНИСЕФ ва ХАБИТАТ шоиста дониста шудааст. Назар ба иттилои Шавкат Саидов, котиби матбуотии раиси шаҳри Душанбе дар радифи Душанбе инчунин шаҳрҳои Бейрути Калон (Лубнон), Метро Манила (Филиппин), Марокаш , Найроби (Кения), Рио-де Жанейро (Барзалия), Сан-Хосе (Коста-Рика), Тегусигалпа (Гондурас) ба сифати маконҳои татбиқи Иқдомоти Глобалии мазкури СММ интихоб шудаанд. Роҳандозии Барномаи мазкур дар марҳилаи аввал -таи ду соли оянда расидан ба ҳадафҳои беҳсозии омори хушунат нисбати кӯдакон, ҷавонон ва занон, огоҳӣ ва баланд бардоштани ӯҳдадориҳои мақомоти маҳаллии ҳокимияти давлатӣ ва ҳифзи ҳуқуқ дар мавриди ҳимояи ҳуқуқ ва имкониятҳои занону кӯдакон ва ҷавонон, афзоиши захираву нерӯҳои сафарбаршаванда барои ҳимояи занону кӯдакон дар ноҳияҳои гирифтор ба мушкилиро дар назар дорад.