Иҷрои буҷа дар татбиқи барномаи давлатӣ

Душанбе, 6 апрел.(АМИТ «Ховар», Марзия Саидова).- Дар назар аст, ки дар давоми солҳои 2012-2013 тавассути татбиқи барномаҳои аз ҷониби ҳукумати мамлакат таҳияшуда дар кишвар беш аз 60 ҳазор нафар ҷавон бо намудҳои гуногуни шуғл фаро гирифта мешаванд. Ин матлаб зимни муҳокимаи парлумонӣ, ки 6 апрел дар палатаи поёнии парлумони мамлакат баргузор шуд, ироа гардид. Дар муҳокимаи парлумонӣ, ки бо ташаббуси кумитаи Маҷлиси намояндагон доир ба илм, маориф, фарҳанг ва сиёсати ҷавонон бо иштироки роҳбарони вазорату идораҳои марбута гузаронида шуд, масъалаи «Иҷрои Буҷаи давлатии Ҷумҳурии Тоҷикистон дар давраи солҳои 2010 – 2011 вобаста ба татбиқи Барномаи «Ҷавонони Тоҷикистон» барои солҳои 2010 — 2012» баррасӣ гардид.Мирганд Шаҳбозов, муовини раиси Маҷлиси намояндагон зикр кард, ки яке аз тадбирҳои муҳими ин бахш қабул ва татбиқи барномаи давлатии «Ҷавонони Тоҷикистон» барои солҳои 2010-2012 аст. Ин барнома самтҳои муҳими сиёсати давлатии ҷавонон, аз қабили ташаккули фарҳанги маънавию сиёсӣ ва маърифати ҳуқуқии ҷавонон, ташаббуси ҷавонон ва иттиҳодияҳои ҷамъиятии ҷавонон, шуғл, мустақилияти иқтисодии ҷавонон ва рушди соҳибкорӣ дар байни онҳо, таҳсил, такмили ихтисос, тайёр намудани кадрҳо ва дастгирии ҷавонони лаёқатмандро дар бар мегирад. Марҳабо Ҷабборова, раиси Кумитаи Маҷлиси намояндагон доир ба самтҳои афзалиятноки татбиқи барномаи давлатии «Ҷавонони Тоҷикистон» барои солҳои 2010-2012» ибрози назар карда, онро як бахши ҷудонопазири сиёсати иҷтимоии кишвар арзёбӣ карданд. Ҳамзамон раиси Кумитаи ҷавонон, варзиш ва сайёҳии назди ҳукумати ҷумҳурӣ Маликшо Неъматов ва муовини вазири молияи ҷумҳурӣ Шавкат Соибов «Дар бораи иҷрои Буҷаи давлатии Ҷумҳурии Тоҷикистон дар давраи солҳои 2010 – 2011 вобаста ба татбиқи Барномаи «Ҷавонони Тоҷикистон» барои солҳои 2010 — 2012» ибрози назар карданд.