Имзои Созишнома байни Ҳукумат ва Иттиҳодияҳои корфармоён

Душанбе, 14 апрел. (АМИТ «Ховар», Дилшодаи Хайруллоҳ).- Имрӯз байни Ҳукумати Ҷумҳурии Тоҷикистон, Иттиҳодияи корфармоёни Ҷумҳурии Тоҷикистон ва Федератсияи иттифоқҳои касабаи мустақили Тоҷикистон Созишномаи генаралӣ барои солҳои 2012-2014 ба имзо расид.Дар маросими имзои созишнома аъзои Комиссияи сеҷонибаи танзими муносибатҳои иҷтимоию меҳнатӣ дар Ҷумҳурии Тоҷикистон, ки шумораи баробари намояндагони Ҳукумати Ҷумҳурии Тоҷикистон, Иттиҳодияҳои корфармоёни Ҷумҳурии Тоҷикистон ва Федератсияи иттифоқҳои касабаи мустақили Тоҷикистонро дар бар мегирад, иштирок намуданд. Лоиҳаи созишномаи генералӣ бо Қарори Ҳукумати Ҷумҳурии Тоҷикистон маъқул дониста шуда, онро аз ҷониби Ҳукумати Ҷумҳурии Тоҷикистон Сарвазири мамлакат Оқил Оқилов, аз ҷониби Иттиҳодияи корфармоёни Ҷумҳурии Тоҷикистон ва Федератсияи иттифоқҳои касабаи мустақили Тоҷикистон роҳбарони онҳо Азизбек Шарипов ва Муродалӣ Солеҳов имзо гузоштанд. Созишнома бо мақсади таҳкими усулҳои шартномавии танзими муносибатҳои иҷтимоию меҳнатӣ, тавсеаи ҳамкории мувофиқашудаи давлат, мақомоти намояндагии кормандон ва корфармоён дар робита ба таъмини ҳуқуқу кафолатҳои меҳнатию иҷтимоии кормандон ва дар маҷмӯъ суботи иҷтимоӣ дар давраи миёнамӯҳлат омода шудааст.