Мулоқоти сардори Хадамоти муҳоҷират бо раиси Анҷумани «Пайванд»

Душанбе, 3 апрел. (АМИТ «Ховар», Лутфия Эшонқулова).- Дирӯз дар Душанбе вохӯрии сардори Хадамоти муҳоҷирати назди Ҳукумати Ҷумҳурии Тоҷикистон Сафиалло Девонаев бо раиси Кумитаи иҷроияи Анҷумани тоҷикон ва форсизабонони ҷаҳон «Пайванд» Салоҳиддин Исомуддинов доир гардид.Зимни мулоқот Сардори Хадамоти муҳоҷират иброз дошт, ки бо истифода аз таҷрибаи бархе аз кишварҳо дар самти муҳоҷирати меҳнатӣ, мо шоҳиди дастовардҳои рўзафзун ва бузург дар соҳаи технологияи пешрафта ва сохтмони иншооти муосир бо ҷалби сармояҳои муҳоҷирони меҳнатӣ ва ҳамватанони бурунмарзии онҳо ҳастем.Аз ин рў, дар шароити кунунӣ моро зарур аст, ки ҳамкориро бо тамоми ҳамватанони бурунмарзӣ ва ҷамъиятҳо, инчунин бо ҷамъияту созмонҳое,ки дар хориҷи кишвар машғули фаъолиятанд, дар якҷоягӣ бо Анҷумани «Пайванд» ба роҳ монем.Ин пешниҳод аз тарафи раиси Анҷумани «Пайванд» Салоҳиддин Исомуддинов пазируфта шуд ва ӯ иброз дошт: «Мо ҷонибдори ин иқдоми нек ва андешаи созанда мебошем». Раиси Анҷумани «Пайванд» Салоҳиддин Исомуддинов омодагии хешро ҷиҳати ҳамкории босамар байни Хадамоти муҳоҷират ва Анҷумани «Пайванд» иброз дошт. Қарор шуд, ки созишномаи ҳамкорӣ байни Хадамоти муҳоҷирати назди Ҳукумати Ҷумҳурии Тоҷикистон ва Анҷумани тоҷикон ва форсизабонони ҷаҳон дар моҳҳои оянда ба имзо расад.Дар ин бора ба АМИТ «Ховар» аз маркази матбуоти Хадамоти муҳоҷирати назди Ҳукумати Ҷумҳурии Тоҷикистон хабар доданд.