Нақби Шаҳристон

Суғд, 19 апрел. (АМИТ «Ховар», М.Амонов). – Дар иншооти бузурги иртиботии мамлакат — нақби «Шаҳристон» корҳои нақбканию сохтмонӣ дар ду самт – қисмати ҷанубу шимол ҷараён доранд. Коргарону мутахассисони тоҷику чиноӣ ағбаи Шаҳристонро дар мавзеи Қумбел шикофта, корҳои пармакунӣ, таркишу мустақаҳкамкунӣ, бетонрезӣ ва роҳсозиро дар нақб суръат мебахшанд. Ҳар рӯз аз ду ҷониби иншоот 10 — 12 таҷҳизоти пармакунӣ фаъолият мекунад. Иншоот дар асоси Созишномаи Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин бунёд мегардад, арзиши лоиҳавиаш 175 млн. сомонӣ, дарозии нақби мошингард 5 ҳазору 153 метр ва дарозии нақби ҳаводиҳанда 5 ҳазору 289 метр аст.Барои пайвасти ҳар ду қисмат дар нақби мошингузар 72 метр ва дар нақби ҳаводиҳанда 28 метр боқӣ мондааст. Бино ба иттилои роҳбари лоиҳа Сон Ли Ҷон дар мӯҳлати наздиктарин пайвасти нақб, яъне кушодани нақб ба вуқӯъ мепайвандад. Корҳои сохтмонӣ то охири соли равон пурра ба анҷом мерасанд.