Омодагии ширкати ҷопонӣ ҷиҳати сармоягузорӣ ба Тоҷикистон

Душанбе, 20 апрел. (АМИТ «Ховар», Бекназари Абӯбакр). — Раиси Кумитаи давлатии сармоягузорӣ ва идораи амволи давлатии ҶТ Давлаталӣ Саидов бо намояндагони Ширкати ҷопонии Sumitomo Corporation, ки аз бузургтарин ва куҳантарин ширкати тиҷоратию сармоягузории дунё ба ҳисоб меравад, мулоқот намуд. Дар ҷараёни мулоқот Д. Саидов фазои сармоягузории Тоҷикистон, бартариву сабукиҳои барои сармоягузорон пешниҳодшаванда, инчунин имконияту иқтидорҳои сармоягузории мамлакатро барои сармоягузорон муаррифӣ намуд. Ҳамзамон тарафҳо соҳаҳои эҳтимолӣ ва судманди иқтисоди мамлакатро, аз қабили гидароэнергетика, истихроҷ ва коркарди захираҳои канданиҳои фоиданок, телекоммуникатсия мавриди баррасӣ қарор доданд. Дар ҷараёни вохӯрӣ ҷониби ҷопонӣ изҳор намуд, ки дар айни замон ширкат имконият ва бозори телекоммуникатсионӣ ва маъданҳои кӯҳии мамлакатро таҳлил ва арзёбӣ менамояд.