Зиёд шудани истеҳсоли гӯшту шир

Душанбе, 18 апрел.(АМИТ «Ховар», Лаззат Диловарзод).- Дар моҳҳои январ-марти соли 2012 истеҳсоли гӯшт дар ҳамаи сохтори хоҷагиҳо ба 23 ҳазору 911 тонна расонида шудааст, ки нисбат ба моҳҳои январ – марти соли 2011 9,1 фоиз зиёд аст.Тибқи маълумоти Агентии омори назди Президенти ҶТ, истеҳсоли гӯшт дар ВМКБ 37,4 фоиз, вилояти Хатлон -9,3, Суғд-4,8 ва ноҳияҳои тобеи ҷумҳурӣ 10,5 фоиз афзоиш ёфтааст. Дар ин давра дар ҳамаи шаклҳои хоҷагидорӣ беш аз 130 ҳазор тонна шир низ истеҳсол шудааст, ки он нисбат ба ҳамин давраи соли 2011 7 фоиз зиёд аст. Хоҷагиҳои истеҳсолкунанда баробари барзиёди истеҳсоли гӯшту шир нархи маҳсулоти худро низ боло бурданд, ки боиси нигаронӣ мебошад.