Ҳосили фаровони меваю сабзавот пешгӯӣ мешавад

Душанбе, 23 май.(АМИТ «Ховар», Лаззат Диловарзод).- Аз Раёсати кишоварзии вилояти Хатлон ба мухбири АМИТ «Ховар» иттилоъ доданд, ки имсол боғдорону сабзавоткорони вилоят ҳосили фаровони меваю сабзавоти барвақтӣ ба даст оварда, дар баробари таъмини бозори дохилӣ, содироти онро ба хориҷи кишвар низ зиёд хоҳанд кард.Ба иттилои манбаъ хоҷагиҳои деҳқонии вилоят дар майдони беш аз 5 ҳазор гектар пиёзи барвақтӣ кишт кардаанд. Тибқи ҳисоби пешакӣ зиёда аз 200 ҳазор тонна пиёз ҷамъоварӣ хоҳад шуд.Танҳо дар ноҳияи Қумсангир дар майдони 780 гектар пиёзи барвақтӣ кишт шудааст. Ба замми ин дар вилоят дар майдони 4 ҳазор гектар картошкаи барвақтӣ кишт шудааст, ки нисбат ба ҳамин давраи соли 2011 ба андозаи 25 фоиз зиёд аст. Ин дар мавриде гуфта мешавад, ки дар айни замон дар бозорҳои шаҳри Душанбе нархи як кило картошкаи барвақтӣ 6-7 сомонӣ ва пиёз бо нархи 3-3,5 сомонӣ ба фурӯш бароварда шудааст. Дар давоми як ҳафтаи охир нархи картошка ва пиёз ду баробар боло рафтааст, ки ин боиси нигаронист.