Бунёди марҳилаи сеюми хатти оби нӯшокӣ дар Хуҷанд

Хуҷанд, 7 май. (АМИТ «Ховар», Мирзалӣ Амонов).- Бо кушодани қубури асосии соҳили рост бунёди хатти обрасонии шаҳри Хуҷанд барои таъмини пурраи аҳолӣ бо оби тозаи ошомидании сойи Хоҷабокирғон ба итмом мерасад. Барои сохтмони хатти обрасонии шаҳри Хуҷанд 61 миллион сомонӣ аз буҷаи мутамаркази давлатӣ ҷудо шудааст. Насби қубури асосии соҳили рост марҳилаи 3-ми ин иншооти муҳим ба ҳисоб рафта, оби сои Ҳоҷабоқирғон ба соҳили рости шаҳри Хуҷанд тавассути хати об ба масофаи 6,8 км бурда мешавад. Хатти об ба соҳили шаҳри Хуҷанд аз ҷониби Ҷамъияти Саҳомии «Корез лоиҳа» — и шаҳри Душанбе тарҳрезӣ шуда, корҳои сохтмониро ҷамъияти дорои масъулияти маҳдуди «Ориён-КS» — и шаҳри Хуҷанд ба ӯҳда дорад.Дар бунёди хатти обрасонӣ қубурҳои полиэтилении қутрашон 630 милиметрии ватанӣ, ки истеҳсоли ширкати «Старпласт» — и шаҳри Хуҷанданд, истифода мешаванд.