Иқдоми Кумитаи ҷавонон ва вусъати худогоҳию худшиносӣ

Душанбе, 25 май. (АМИТ «Ховар», Дилшодаи Хайруллоҳ).- Дар доираи нақшаи чорабиниҳои «Барномаи давлатии тарбияи ватандӯстии ҷавонони Тоҷикистон барои солҳои 2011-2013» Кумитаи ҷавонон, варзиш ва сайёҳӣ бо мақсади вусъати худогоҳию худшиносӣ ва ватанпарастию ҳуввиятсозии насли наврас ва ҷавон дар полки комендантии Вазорати мудофиаи Ҷумҳурии Тоҷикистон бо сарбозону афсарон вохӯрӣ баргузор кард. Зикр кардан бамаврид аст, ки ҳамарӯза дар қисмҳои низомии мақомоти қудратии мамлакат сӯҳбату вохӯриҳо бо ҷавононе, ки дар даъвати навбатӣ ба сафи Қувваҳои мусаллаҳ шомил шудаанд, ҷараён мегирад. Дар вохӯрӣ ба сарбозон маводи иттилоотӣ, ки аз ҷониби Кумита омода гардидаанд, тақсим шуданд. Ҳамчунин ба сарбозони полки комендантӣ, ки дар фестивал-озмуни ҷумҳуриявии сурудҳои ватанпарастонаи «Суруди сарбоз» иштироки фаъол доштанд, диплом, тӯҳфаҳои хотиравӣ, аз номи роҳбарияти Кумитаи ҷавонон 1 адад телевизор ва 1 адад DVD тақдим карда шуд, ки ин иқдом ба бедор намудани ҳисси миллӣ ва меҳандӯстии насли ҷавон мусоидат менамояд.