Идомаи боздиди Вазири корҳои хориҷии Тоҷикистон аз ИМА

Душанбе, 18 май. (АМИТ «Ховар», Покиза Маҳмадбекова). — 17 майи соли равон Вазири корҳои хориҷии Ҷумҳурии Тоҷикистон Ҳамрохон Зарифӣ, ки ҳайати Тоҷикистонро зимни сафар ба ИМА роҳбарӣ мекунад, дар машваратҳои солонаи дуҷониба бо Иёлоти Муттаҳидаи Амрико ширкат варзид. Аз Раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ «Ховар» хабар доданд, ки рӯзи аввали машваратҳо ҳайатҳои Тоҷикистон ва ИМА масъалаҳои доир ба амният, таҳкими марзҳо, ҳамкориҳои иқтисодӣ ва сармоягузориро муҳокима намуданд. 18 май машваратҳои дуҷониба идома хоҳанд дод. Дар нимаи дуюми рӯзи 17 май Вазири корҳои хориҷии Тоҷикистон бо аъзои Конгресси ИМА, Сардори зеркомиссияи Аҳзоби Намояндагони ИМА оид ба масъалаҳои Аврупо ва Авруосиё ҷаноби Дан Буртон вохӯрӣ намуд. Зимни вохӯрӣ мусоҳибон вазъи ҳамкориҳои дуҷониба ва нақши парлумон дар рушди минбаъдаи равобити миёни ИМА ва Тоҷикистонро муҳокима карданд. Ҳамчунин Вазири корҳои хориҷии Тоҷикистон бо намояндаи Шӯрои амнияти миллии ИМА Алис Веллс вохӯрӣ намуд. Мусоҳибон раванди вазъ дар минтақа ва Афғонистон, масоили мубориза бар зидди маводи мухаддир ва дигар масъалаҳои байналмилалиро баррасӣ карданд. Шоми рӯзи 17 май, дар Донишкадаи омӯзиши Осиёи Марказӣ ва Қафқози Донишгоҳи Ҷон Ҳопкинс cуханронии Вазири корҳои хориҷии Тоҷикистон Ҳамрохон Зарифӣ дар мавзӯи «Тоҷикистон ва Осиёи Марказӣ дар партави соли 2014» баргузор гардид. Зимни он дипломати тоҷик назари худро доир ба раванди вазъи минтақа дар партави баровардани қӯшунҳои муштарак аз Афғонистон дар соли 2014 ва татбиқи лоиҳаҳои инфрасохториро ҷиҳати барқарорсозии иқтисодию иҷтимоии ин кишвар баён намуд. Вазири корҳои хориҷӣ дар поёнӣ суханронӣ ба саволҳои ҳозирин посух дод.