Коҳиши истеҳсолот ва таъсири он ба буҷа

Душанбе, 23 май.(АМИТ «Ховар», Лаззат Диловарзод).- Тибқи маълумоти омории вилояти Хатлон дар 4 моҳи аввали соли ҷорӣ дар вилоят нисбат ба ҳамин давраи соли 2011 ҳаҷми маҳсулоти саноатӣ 25 фоиз афзуда бошад ҳам, аммо дар баъзе шаҳру навоҳӣ истеҳсоли баъзе номгӯи молҳои саноатӣ баръакс коҳиш ёфтааст. Илова бар ин аз 237 корхонаи саноатии вилояти Хатлон 70-тои он фаъолият накард, ки ин ба музди меҳнат, таъминоти иҷтимоии коргарон ва иҷрои нақшаи даромади буҷа таъсири манфӣ расонид.Ҳукумати ҷумҳурӣ бо назардошти афзоиши истеҳсоли қувваи барқ ҳамаи сохтору мақомоти дахлдорро вазифадор намуд, ки фаъолияти мураттаби ҳар як корхонаву ташкилотро зери назорати қатъӣ қарор дода, ҷиҳати ташкили кор дар ду-се баст бо истифодаи самараноки иқтидорҳои истеҳсолӣ ҷиҳати татбиқи иҷрои истеҳсоли маҳсулоти саноатӣ тадбирҳои ҷиддӣ андешанд.