Маҷлиси миллӣ Қонуни конститусисониро ҷонибдорӣ хоҳад кард
Душанбе, 25 май.(АМИТ «Ховар», Марзия Саидова).-14 июни соли 2012 дар шаҳри Душанбе иҷлосияи нўҳуми Маҷлиси миллии Маҷлиси Олии Ҷумҳурии Тоҷикистон даъвати чорум баргузор мегардад. Дар ин хусус 24 май Маҳмадсаид Убайдуллоев, раиси Маҷлиси миллии Маҷлиси Олии ҷумҳурӣ қарор ба имзо расонд. Аз палатаи болоии парлумони мамлакат ба АМИТ «Ховар» итилоъ доданд, ки дар иҷлосия маҷмўи масъалаҳои муҳими марбут ба рушди бахшҳои иқтисодию иҷтимоӣ ва фарҳангии мамлакат, аз ҷумла Қонуни конститутсионии Ҷумҳурии Тоҷикистон «Оид ба ворид намудани тағйиру иловаҳо ба Қонуни конститутсионии Ҷумҳурии Тоҷикистон «Дар бораи судҳои Ҷумҳурии Тоҷикистон» баррасӣ мегарданд. Ҳамзамон интизор меравад, ки аъзои палатаи болоии парлумони ҷумҳурӣ Қонунҳои Ҷумҳурии Тоҷикистон «Дар бораи баҳисобгирии инфиродӣ дар низоми суғуртаи ҳатмии нафақавӣ», «Дар бораи амнияти нақлиётӣ», «Дар бораи ангишт» ва масъалаи ворид намудани тағйиру иловаҳо ба Кодексҳои мурофиавии граждании Ҷумҳурии Тоҷикистон ва мурофиавии иқтисодии Ҷумҳурии Тоҷикистонро муҳокима ва ҷонибдорӣ хоҳанд кард.