Моҳиҳои обанбори Қайроққум куҷо рафтанд?

Душанбе, 29 май. (АМИТ «Ховар», Лаззат Диловарзод).-Бино ба маълумоти КВД «Моҳии Тоҷикистон», баъди пош хӯрдани Иттиҳоди Шӯравӣ соҳаи моҳипарварӣ то дараҷае паст рафт ва дар баъзе ҷойҳо тамоман барҳам хӯрд.Баъди мустақилияти ҷумҳурӣ ва қабули Барномаи давлатии рушди моҳипарварӣ имкони аз нав ташкил додани соҳа ба миён омад.Ба иттилои манбаъ, дар моҳҳои январ — апрели соли 2012 дар хоҷагиҳои моҳипарварии ҷумҳурӣ 171,3 тонна, аз он ҷумла дар хоҷагиҳои моҳипарварии вилояти Хатлон ба миқдори 143,8 тонна, вилояти Суғд 22,4, ВМКБ – 3,5, ноҳияи Ваҳдат — 0,9 ва ноҳияи Рӯдакӣ ба миқдори 0,7 тонна моҳӣ истеҳсол шудааст. Ин дар мавридест, ки дар соли 1974 танҳо дар обанбори Қайроққуми вилояти Суғд сайди моҳӣ 552 тоннаро ташкил медод. Соли 2011 дар ҳавзаи Сирдарё ҳамагӣ 90 тонна моҳӣ ба фурӯш бароварда шудааст.Саволи матраҳ ин аст, ки моҳиҳои обанбори Қайроққум ва ҳавзаи Сирдарё ба куҷо ғайб заданд, ки имрӯз дар вилояти Суғд чоряки моҳии соли 1974 сайд карда намешавад?