Нашри маҷмӯаи барӯйхатгирии аҳолй ва фонди манзил дар соли 2010

Душанбе, 26 май. (АМИТ «Ховар», Покиза Маҳмадбекова). — Маҷмӯаи «Шумораи аҳолии Ҷумҳурии Тоҷикистон тибқи маълумотҳои барӯйхатгирии аҳолй ва фонди манзил дар соли 2010» аз чоп баромад. Мувофиқи Фармони Президенти Ҷумҳурии Тоҷикистон «Дар бораи гузаронидани барӯйхатгирии аҳолӣ» аз 21 то 30 сентябри соли 2010 дар қаламрави ҷумҳурӣ барӯйхатгирии аҳолӣ ва фонди манзил гузаронида шуд. Баъди гузаронидани ин маърака маълум гардид, ки дар Ҷумҳурии Тоҷикистон 7 миллиону 565 ҳазор аҳолӣ умр ба сар мебарад.Бояд гуфт, ки нисбат ба маълумоти барӯйхатгирии аҳолии соли 2000-ум шумораи аҳолии ҷумҳурӣ ба миқдори 1 млн. 438 ҳазор нафар ё худ 23% афзудааст. Сарфи назар аз хуруҷи аҳолии шаҳр ба хориҷи ҷумҳурӣ, дар муқоиса бо соли 2000-ум соли 2010 аҳолии шаҳр ба миқдори 379 ҳазор нафар ё худ 23,3% ва аҳолии деҳот ба миқдори 1059 ҳазор ё худ 23,5% бештар гардидааст.