Нуқтаи фурӯши сӯзишворӣ дар Мӯъминобод

Кӯлоб, 29 май. (АМИТ «Ховар», С.Холов). – Дар ҷамоати деҳоти «Тебалай» — и ноҳияи Мӯъминобод аз тарафи соҳибкор Хуршед Зарипов нуқтаи замонавии фурӯши гази моеъ ва сӯзишворӣ ба истифода дода шуд, ки якумин нуқтаи фурӯши газ дар ноҳия аст. Тавре ки Хуршед Зарипов иброз дошт, мақсади таъсиси нуқтаи фурӯши сӯзишворӣ бо ҷои кор таъмин кардани корҷӯён мебошад. Дар иншооти навтаъсис 10 нафар фаъолият доранд. Нархи фурӯши 1 литр гази моеъ 2 сомонию 50 дирам ва сӯзишворӣ 6 сомонию 40 дирам буда, сифати маҳсулот ба талаботи стандартӣ ҷавобгӯй мебошад. Рушди соҳибкорӣ дар ноҳия зина ба зина баланд мегардад. Дар давоми 5 моҳи соли ҷорӣ як маркази варзишӣ ба истифода дода шуда, инчунин дар рӯзҳои наздик таъсиси корхонаҳои коркарди пӯсту пашм ва сехи истеҳсоли дару тирезаҳои пластикӣ барои хонаҳои истиқоматӣ ва иншоот дар назар аст.