Татбиқи 14 лоиҳаи сармоягузорӣ бо қимати 225 млн. доллар
Душанбе, 11 май. (АМИТ «Ховар», Лаззат Диловарзод).- Бино ба иттилои маркази матбуоти Вазорати иқтисод ва савдои ҷумҳурӣ хазинаи сармоягузории Бонки ҷаҳонӣ аз рӯи 14 лоиҳаи татбиқшаванда дар Ҷумҳурии Тоҷикистон 225 млн. доллар маблағ сарф мекунад.Ба иттилои манбаъ, 35 фоизи маблағи сармоягузории Бонки ҷаҳонӣ барои бахши энергетика ва таъминоти оби ошомиданӣ ҷудо гардидааст. Дар ҷойи дуюм бахши кишоварзӣ қарор дорад, ки барои рушди соҳа 31 фоизи маблағи хазинаи Бонки ҷаҳонӣ масраф хоҳад шуд. Бонки ҷаҳонӣ аз рӯи татбиқи 14 лоиҳа 31 фоизи маблағро барои соҳаи рушди маориф ва ва танҳо 4 фоизи онро барои рушди иқтисоди бахши давлатӣ пешбинӣ намудааст.Дар соли 2012 Бонки ҷаҳонӣ ба Тоҷикистон дар ҳаҷми 11,85 млн. доллари амрикоӣ маблағи грантӣ (бебозгашт) ҷудо намуд. Аз рӯи қисмати охирини лоиҳа вазъи 200 ҳазор нафар сокини ҷануби кишвар барои дастрасӣ ба оби тозаи ошомиданӣ беҳтар гардонида мешавад.