Қонуне, ки истифодаи воситаҳои криптографиро танзим менамояд

Душанбе, 6 июн.(АМИТ «Ховар», Марзия Саидова).-Лоиҳаи Қонуни Ҷумҳурии Тоҷикистон «Дар бори криптография»-ро палатаи поёнии парлумони Тоҷикистон 6 июни соли 2012 баррасӣ ва қабул намуд.Зимни ташреҳи он Сўҳроб Паноев, муовини раиси Кумитаи давлатии амнияти миллии ҷумҳурӣ ва Муҳиддин Кабирӣ, вакили Маҷлиси намояндагон зикр карданд, ки лоиҳаи қонуни мазкур асосҳои ҳуқуқии муносибатҳои ҷамъиятиро дар бахши криптография муайян намуда, тартиби таҳия, истеҳсол ва истифодаи воситаҳои криптографиро дар ҷараёни мубодила ва нигоҳдории иттилоот танзим менамояд. Ҳамзамон вакилони палатаи поёнии парлумони Тоҷикистон лоиҳаи Қонуни Ҷумҳурии Тоҷикистон «Дар бораи ворид намудани тағйиру иловаҳо ба Кодекси гумруки Ҷумҳурии Тоҷикистон»-ро муҳокима ва қабул намуданд, ки ҳадафаш мутобиқ намудани қонунгузории гумруки кишвар ба талаботи Созмони Ҷаҳонии Тиҷорат аст. Неъмат Раҳматов, муовини аввали сардори Хадамоти гумруки назди Ҳукумати ҷумҳурӣ ва Мунаввара Кенҷаева, вакили Маҷлиси намояндагон зимни тавзеҳи масъала зикр намуданд, ки лоиҳаи мазкур ба Кодекси гумруки Ҷумҳурии Тоҷикистон мафҳуми «маҳсулоти қалбакӣ (контрафакт)»-ро ворид намуда, усули таъйини арзиши гумрукӣ дар асоси ҷамъи арзиш ва пешниҳоди маълумоти махфӣ ба суд ва мақомоти тафтишоти пешакиро такмил медиҳад.