Безараргардонии боз як гурӯҳи муташаккили ҷиноятӣ
Душанбе, 5 июн. (АМИТ «Ховар», Лутфия Эшонкулова).-4- уми июни соли равон ҳангоми гузаронидани амалиёти махсуси фаврию ҷустуҷӯӣ аз тарафи кормандони мақомоти махсуси Вазорати корҳои дохилӣ гурӯҳи ҷинояткори муташаккили мусаллаҳ бо роҳбарии Шералӣ Адҳамов , соли таваллудаш 1975, ки барои содир намудани чандин ҷинояти махсусан вазнин (одамкушӣ, таркиш) дар кофтукови байналмилалӣ қарор дошт, дастгир ва безарар гардонида шуд.Тавре ки ба АМИТ «Ховар» аз маркази матбуоти ВКД хабар доданд, ҳангоми дастгир намудани Ш. Адҳамов ва гурӯҳи ў аз ҷониби онҳо муқовимати мусаллаҳона нишон дода шуд. Дар манзили Адҳамов, воқеъ дар деҳаи Бедаки ноҳияи Панҷ ду адад автомати тамғаи Калашников, ду норинҷак, 800 дона тир, 15 адад телефони мобилӣ, 103 адад симкарта, як адад воситаи мухобира, дигар таҷҳизоти ҳарбӣ, якчанд мошини бо роҳи ҷиноят ба дастомада, миқдори ниҳоят калони маводи мухаддир ва ҳуҷҷатҳое, ки аз содир шудани ҷиноят шаҳодат медиҳанд, кашфу мусодира шуд. Инчунин се нафар ҳаммаслаки ў дастгир шуданд. Дар гузаронидани амалиёти махсуси Вазорати корҳои дохилӣ кормандони амнияти миллӣ ҳамкорӣ намуданд.